Inspirational poem of Javed Akhtar

Jo baat kehte darte hain sab, tu woh baat likh
Itni andheri thhi na kabhi pehle raat, likh

Jin se qaseede likkhey thhay woh phenk de qalam
Phir khoon-e-dil se sachche qalam ki sifaat likh

Jo roznamon mein kahin paati nahin jagah
Jo roz har jagah ki hai, woh waardaat likh

Jitne bhi tang daire hain saarey torh de
Ab aa khuli fizaon mein ab kainat likh

Jo waqeyaat ho gaye unka to zikr hai
Lekin jo hone chaahiye, woh waqeyaat likh

Iss bagh mein jo dekhni hai tujh ko phir bahaar
Tu daal-daal de sada, tu paat-paat likh